فضاء مكوكي.. - دلع وجنون

احنا في اليوم السابع؟؟

يعني اسبوع!! كبرت وعجّزت يا مُرسي ،، مين كان يصدّق اني بأكمل اسبوع؟؟

اخواتي في البيت وصديقاتي كانت مراهناتهم لليوم العاشر مو أكتر وإن ما كانت أقل ،، يالله حطّوا انتو كمان رهاناتكم!!

من جد الإجازة دي زهق!!

طوال أربعة أشهر صيفية حارقة لازم الواحد يخطط فين يبغى يروح ويبغى يجي

قبل كم يوم رحت قرية مرسال لو تعرفوها ،، حلوة لإنها ما كانت مزحومة والناس قليلين.

لعبنا كم لعبة وجاني الدوار منها ،،

قرأت القرآن كله وأنا على الشواية

المصيبة :

انت راكب على الصندوق المعدني فوق المنصة ، وتنظر في أعين المتفرجين وهم متحمسين لبدء اللعبة ، تبًا ، تعالوا اركبوا وراح تعرفوا انه الله حق!!

تقفل الحدائد الآمنة وتعرف انك وقعت في شرك وحصار لا مفرّ منه

تتسارع نبضات قلبك وتنظر بخوف لكل الناس الموجودين على الأرض آمنين سالمين غانمين

تلعن في قرارة نفسك على جرأتك السخيفة وركوبك للعبة

تبدأ نبضات قلبك تتسارع بخوف عندما تسمع زئير الوحش الذي تجلس عليه

هاهي حياتك أسيرة بين مخالبه السوداء

ترتفع في الهواء وأعين الناس تحدق بك ، ابتسامة صفراء ومحاولة فاشلة لبلع ريقك

"اتمنيت ساعتها لو انتزعت قلبي وخليته مع كاب أخي الصغير تحت عند ماما"

وتبدأ الدراما ويندفع الأدرينالين..

معذرة اتلفت الشريط هنا لإنه المشاهد كانت خطرة على ضعاف القلوب

أحلى شيء لمن تخلص اللعبة وتنزل وانت تترنح منها جراء الشقلبة واللف..

تحس راسك يدور بسرعة 200 كيلو في الثانية..

وانت تضحك والناس تضحك.. وجع في شكل ابليس ماحد يضحك غير اللي يلعب والباقين يجرب وبعدين يضحك!!

ما أعرف ايش ربنا محوجني اني أركب.. بس ممتعة كانت..

طبعًا ما يحتاج احكي عن جبال الروس "الرولوكوستر"؟!!

اسماء الدلع للإنسان كثيرة..

وأحلاها ما كان في الصغر..

طبعًا ايش جاب الموضوع على راسي.. أخي قبل كم يوم بيسأل عن أسماء لمولود/تـ/ه

فينك يا عميريني ؟؟ فاكر لمن كنت تدور على أسماء ؟؟ لفينا ووقعنا في المطب

طبعا بالصدفة كل ما نختار اسم "لصبي" بيكون فيه حرف السين!! وكل ما لفظنا الاسم اضحك

أخي سألني ليش أضحك !! قلت له كل الأسماء راح تنتهي بــ "سوسو"!!

الله ، ولد أخوي وأنا حرّه فيه ، أدلعه بكيفي

فقد نلت نصيبي من أسماء وألقاب كان مخترعها أخي

يعني زي بنو ، تيغا ، توتو ، احم احم صمنديقه ، ولا حد يتريق لإنه بياكل بوكس!!

اتسميت لمن اتعميت.. بس كله كوم وتوتو كوم!!

كيف طلعت مش عارفه

زي وحدة من صاحبات أختي اسمها رجاء وندلعها شوشو

عادة تكون اسماء الدلع اختصارات للاسم الحقيقي ،، بس لمن يشطح زي شوشو وتوتو فيها كلام تاني؟؟

أقول!!

نفسي أعرف الناس كيف تحب الصيف وتستناه؟؟

حر ، حر ، حر

غريب أمر الناس يستنوا المطر ولمن يجي يختفوا ويتخبوا

ينتظروا الصيف ولمن يجي يشردوا على البلاد الباردة أو يجلسوا تحت المكيّف

اعطونا حل وسط

اتمنى لكم صيف ممتع

سلام مكوكي..