حسبي الله ونعم الوكيل فيك..
.
.
الاربعاء, 31 يناير, 2007
الثلاثاء, 30 يناير, 2007
يقولكم المتل : ان كنت رايح كتّر من الفضايح..
وطالما دا كان آخر اختبار ، فيعني كان فضيحة بمعنى الكلمة..
هو كم سؤال معتبرين كدا مجموعهم 12 درجة تركتهم ،
بكل بساطة أنا ماني فاكرة اننا درسنا حاجة زي دي في المنهج..
بس..
الواحد يكرف طول السنين عشان يحافظ على معدله..
وبعدين مادة سهلة زي دي تجي وتفركش أبوه..
يالله الحمد لله على كل حال..
سلام مكوكي..
الاثنين, 29 يناير, 2007
مساء الورد..
امس واليوم حاولت أدخل على جيران وحاولت أعلق على مدونتي ومدونات الباقين ما قدرت..
في النهاية اكتشفت انه جيران غيرت كل حاجة.. :S
بس بيني وبينكم..
there's a lot to explore!!
والله يا جيران لخبطتيني بكل الحاجات الجديدة دي..
شغل حلو والله ومجهود تشكرو عليه..
nice work..
يالله اسيبكم تنشغلوا شوية بالمزايا الجديدة وأنا رايحة استكشف ايش في جديد.. :)
سلام مكوكي..
الاحد, 28 يناير, 2007
المادة : تحليل وتصميم خوارزميات
الوقت : ساعتين
التاريخ : بداية السنة
النتيجة : جبت العيد
التعليق : :/
سلام مكوكي..
الجمعة, 26 يناير, 2007
يالله اشوفكم الأحد وقت الاختبار التاني.. الاختبار اللي من جد يفجع..الناس الخميس نايمة وأنا أصحى أروح أختبر ، لا وأختبر مادة الصعبة
بس الحمد لله زاكرتها تمام التمام وسويت لها ملخصات
وفوق دا كله رسلت الملخصات دي لدكتور المادة ، أجنن صح!! p:
الموهم..
دخلنا الاختبار ، كانت مدته ساعتين
بديت في كل الأسئلة وحليتها وجيت لسؤال 14 وانصدمت..
وأقولكم ليه وقولولي اذا كانت الصدمة في مكانها ولا لأ..
المنهج تبعنا كان شابتر 4 - 5- 6- 8
بس شابتر 8 كان نصه بس ، شرحه في وحدة محاضرة
المهم.. سؤال 14 كان في النص اللي ما انشرح
يعني ولا وحدة فينا ما فهمت يعني ايش "consept of hardware dependent indexed sequensial file"
نادينا رئيسة قسمنا ، اتصلي بيه وقولي له دا الجزء ما انشرح
كلمته ، فقالها بكل بساطة لو انتو فهمتو شرح الجزء الأولاني راح تقدروا تشرحوا الجزء التاني
بس انا هنا اتورطت ، لإني أصلا ما حضرت شرح الجزء الأولاني ، كنت مريضة والله وغايبة.. :(
حليت اللي قدرت عليه..
خرجت من المحاضرة واتصلت بنفسي على دكتور المادة ، قلت له شكرًا على الأسئلة اللي "تجنن" وحبيت أسألك اذا وصلتك الملخصات ولا لأ!!
قالي يا بنان انت خرجت بدري ليه من الامتحان؟؟
قلت له عادي حليت وخرجت أقعد اعمل ايه يا د.محمد؟؟
قالي ما شاء الله واضح انك مزاكرة ، حتى الملخصات عجبتني أوي وتنفع للشرح في السنين الجاية..
قلت له ممتاز جدًا ، شكرًا على كل حاجة..
لسه ما خلصت القصة لا أحد يتحرك ، الآكشن جاي في الطريق..
رجعت البيت وغيرت هدومي لإني نازلة جدة..
فجأة وحدة من صاحباتي اتصلت علي وقالت لي ترى احنا المجموعة حقتنا ما اتوزعت لها سؤال البونس ، قلت لها كيف يعني!!
(احنا تلات مجموعات كل مجموعة في قاعة بتختبر لحالها ، المجموعتين التانية استلموا ورقة عليها سؤال للبونس واحنا المراقبة علينا ما وزعتها لنا أظن نسيان)
المهم ، قلت يالله ما ادم بونس قلبي ما راح ينحرق عليها كتير مع اني في حاجة لكل درجة ممكن تعوضني عن أخطائي العبيطة..
بعد فترة نص ساعة اتصلت علي وحدة من البنات وانا خلاص في الطريق لجدة،
قالت لي بنان ازا تقدري ترجعي الجامعة ارجعي لإنه السؤال رقم 16 (اللي ما اتوزع علينا) طلع تكلمة للإختبار وماهو بونس!!
ودكتور محمد كلم رئيسة قسمنا وقالها اجمعي بنات القروب وخليهم يكملوا اختبارهم
وعلى فكرة الوقت قيده خلص تبع الفترة حقت الاختبار..
طبعا انا حسيت انه الدنيا فعصتني في النص وكبت علي موية بااااااردة
على طول دموعي نزلت ومرة كنت مقهورة ومعصبة ، اتصلت على دكتور محمد
قلت له انا قيدني في الطريق لجدة وما يمديني ارجع للجامعة لو تبغاني أرجع أرجع ولاّ أسألني السؤال دحين لو تحب وانا مستعدة أجاوبك هو
قالي يا بنان ما تزعليش انتي بنت كويسة أوي وروحي في حفظ ربنا ما ترجعيش الجامعة ، دنتي A
الحمد لله رب العالمين انه قالي كدا..
والحمد لله الاختبار اللي كنت شايلة همه عدى على خير..
وبس باقي درجة الاختبار دا ان شاء الله يكون A+ عشان ما ابغى معدلي ينقص..
سلام مكوكي..
الاربعاء, 24 يناير, 2007
...
الاحد, 21 يناير, 2007
اليوم الأحد..
أول يوم بالاختبارات النهائية..
كان علي نظم تشغيل operating systems..
الاسئلة حلوة وخطيرة ونوعيتها جديدة..
يعني بالمختصر اللي مو فاهم المنهج ما يقدر يحل..
حليت الحمد لله بس كان عندي غلط قهرني..
غررررر.. <<< مسوية زعلانة.. p:
يالله one down، three to go!!
الموهم..
انتو كيف اختباراتكم..
اللي عندو بس!!
سلام مكوكي..
الخميس, 18 يناير, 2007
قبل فترة قريبة تعرفت على شاب محترم وواثق وطموح وناجح ما شاء الله تبارك الله..
الشاب دا اسمه محمد الرحيلي..
يمكن أغلبكم يعرفه أو على الأقل سمع باسمه..
واللي ما يعرفه ولا سمع فيه تعال واسمع..
انا ما راح اتكلم عنه هو بحد ذاته كشخص..
مقالي عن واحد من انجازاته الخطيرة..
قيد سمعتو عنه؟
قيد استخدمتوه؟
مشروع هائل ومتميز بحق..
هدفه خدمة المستهلك بشكل واضح ولا يهدف للربح بتاتًا..
وكان فيه حوار مع محمد الرحيلي عنه وعن فكرته وعن اختراعه..
ايش رايكم في مفقود؟
حلو وخطير صح؟
بالذات لو كلنا آمنا فيه وبجودته وفعاليته..
صديقي العزيز جدًا محمد..
أقف احترامًا لك ويملؤني فخر بك.. :)
ربنا يوفقك وينور دربك ويفتح أبواب الرزق في وجهك..
الله يحميك يا محمد من كل عين حاسدة وكل نفس حاقدة..
كن بخير..
سلام مكوكي..
الثلاثاء, 16 يناير, 2007
أنا حكيتلكم قبل كدا عن موضوع الكالندر اللي في يوم بيدلني على موقع جديد..
أوكي.. اليوم دلني على موقع مرة زوبعة..
فجّر كل الآلام والزكريات الدفينة في نفسي..
اهيء اهيء.. الموقع كان بيتكلم عني..
هو مو كلو بس فكرة الموقع كانت عني..
اوكي..
أحكي الحكاية من الأول لإنه شكلكم ضعتوا مع انه بيتي مرة ما يضيع..
بس في البداية.. اللي حاسس نفسو حيضحك علي ولا يتريق ولا يتمسخر يطلع بره من غير مطرود..
لإنه الموضوع مرة مو هين وحشاش..
تعرفوا مصطلح الفوبيا phobia..
اللي هو الخوف الشديد من شيء معين..
زي متلا الخوف من الأماكن المغلقة Claustrophobia ، الخوف من الظلام Achluophobia ، الخوف من المرتفعات Acrophobia ، الخوف من الناس أو المجتمع Anthrophobia وحاجات كتيرة حتلاقوا الليستة هنا:
المهم انا عندي فوبيا من الألم..
أخاف من الألم الجسدي بشكل لا يوصف..
حكيت انا وصعصع مع بعض اليوم وحاول يعرف ايش اسبابه او فصول الموضوع بس مافيش..
المدار اني أخاف من الألم ومن كل ما يؤدي إليه..
أخاف من أي شيء عليه ضغط pressure أو بيشتغل وقت طويل أو بيؤثر عليه ثقل كبير..
أخاف من مصعد مليان ناس لا يطيح ، أخاف من طيارة كبيرة ومليانة ناس وعفش لا تطيح ، أخاف تلاجة بتشتغل أربعة وعشرين ساعة لا تنفجر ، أخاف من الفرن والبوتجاز ، أخاف من مكيف يشتغل فترة طويلة ، وعلى فكرة أنا ما أدخل حمام - اكرمكم الله - والسخان فيه شغال!!!
أخاف من دي الحاجات كلها مو منها بحد ذاتها ، لا أخاف يصير الشيء اللي أخاف منه ويسبب لي ألم جسدي.. :(
الخوف اللي يجيني مو مجرد خوف.. يجيني رعب ، خوف شديد يسيطر علي لدرجة البكا.. :(
باي ذا واي..
لقيت نوعين من الخوف من الألم..
algophobia - algiophobia
بس مش عارفة مين أنا.. :(
المدار..
اللي خلاني أكتب الموضوع الموقع اللي لقيته..
يقولك اللي يشوف مصايب الناس تهون عليه مصيبته..
انا لقيت كم نوع فوبيا غريبة من جد قلت الحمد لله على النعمة والعافية..
دا الموقع..
اللي نفسي اعرفه..
الواحد كيف يتخلص من الخوف دا؟
اي حاجة.. ان شاء الله آكل فول وطعمية قبل لا آنام.. D:
يالله سلام مكوكي..
السبت, 13 يناير, 2007
من زمان وانا عايزة اقولك ، عايزة اقولك يا حبيبي
من زمان وانا قلبي رسملك شمعة نار واقولك يا حبيبي
لو نسيوني ، انت معاايا
آه بغيابي ، قيد شمعايا
شمعاايا تحكيلك أصل الرواايا
أغنية من زمن جدتي ، سمعتها أول مرة وانا في مصر ايام الابتدائي ، أغنية لعايدة الأيوبي وما أدري كم واحد فيكم يعرفها وكم واحد فيكم سمعها وربما حفظها وتراكم عليها الغبار في الذاكرة العٌتقيّة لبني آدم.
أغنية من زمن يا شمس يا شمس لا لا تغيبي لنبيل شعيل ومابلاش نتكلم في الماضي لعمرو دياب وحاجات من العهد السحيق كدا.
أغنية خلتني أقوم من شبه النومة اللي كنت فيها عشان أكتب موضوع في جيران الساعة اتنين وتلت بعد نص الليل.
أغنية ما أدري ايش اللي جابها على دماغي في وقت انا بأمسّ الحاجة فيه للنوم.
مقرف هو شعور المرهق اللي عارف انه وراه تاني يوم شغل "مترف" وهو ما نام طول اليوم وكمان مو قادر ينام ولا حتى نص ساعة عشان يقدر يكون functional تاني يوم. :/
شعور يشبه غصة اليتيم وهو يشوف ولد يتمازح مع أبوه ، ويشبه الرعب اللي يوقف قلب الغشاش ساعة ما يحط المدرس يده على قفاه ، وشعور عبوة كولا فارغة تقف على رصيف مهجور.
مممم
أخيرًا خلصت من اسبوع الضغط اللي كان مأزّمني..
اجازة الحج مرت علي مو اجازة ، كانت اجازة شغل ودراسة ولله الحمد..
كنت قريبة جدًا من اني افك انبوبة الغاز واحبس نفسي في المطبخ مع شغلي ، او حتى اني ادخل جوات الفريزر الكبير اللي في الدور الأرضي أو حتى اني اوقف في نص طريق المدينة السريع اللي قدام بيتنا.
بس الحمد لله خلصت من 3 بروجكتات.
البروجكت الأول كان عن تصميم سيستم كامل system analysis and design وعملته لـ subway.
عملت البريزنتايشن تبعه والقيته وكان مشروع ناجح جدًا الحمد لله.. وفكرت ابيعه كمان.. مين يحب يشتري سب واي سيستم؟؟؟؟
البروجكت التاني كان عن برمجة داتا بيز لطلاب مع كورساتهم..
عملته وقدمتهم ومناقشتنا مع الدكتور راح تكون يوم الاثنين ان شاء الله..
البروجكت التالت عن ريسيرتش متكامل وكتابة تقرير عن اي نظام تشغيل OS مع عمل سلايد شو..
بحثي كان عن BE Operating System ، وشخصيًا انا استفدت منه مرة وجربت السيستم..
سيستم رهيب بس للأسف ما لقى تجاوب وفلست الشركة اللي مسؤولة عنه وقفلت..
البريزنتايشن تبعه يوم الأحد ان شاء الله..
بالنسبة لاختباراتي فحتكون الاسبوع القادم بحول الله..
اول اسبوع في السنة الجديدة بيكون اول اسبوع اختبارات.. حنفتح السنة الجديدة بهوباااااب وانتو طيبين ان شاء الله..
عندي خمسة مواد تخصص بأختبرها موزعة على اسبوعين..
ربنا يعين ويسهل يا رب.. ويعين ويسهل كل مين عنده اختبارات.. :)
عندي calender في كل صفحة فيها (كل يوم يعني) موقع..
طبعًا احنا اليوم 13/1 يعني عدى 13 يوم و13 موقع..
ابغى اوريكم كم موقع استكشفوه لحالكم لإنه من جد خطير..
زي دا مثًلًا.. D:
قيد جربتوا تفتحوا google او اي محرك بحث وتكتبوا اول كلمة تخطر على بالكم و GO ؟
حركة برضها.. انا دايما اعملها بس بكلمات تواجهني في مجال تخصصي..
يعني مثلًا انا كتبت كلمة smile ولقيت 206,000,000 نتيجة.. ولقيت كم موقع ممتع كمان..
الحركة دي من زمان اتعلمتها من صعصع.. بس هو كتب اسمه بالكامل وطلع له نتايج غير متوقعه.. جربوها..
وانا لما كتبت بنان طلع لي مواقع ايرانية فقط لا غير.. :-O
اعتذر لكل الناس اللي قطعتهم الفترة اللي راحت دي..
وأكيد اوعد اني اتواصل معهم بشكل او بآخر.
اعتذر من خولة لاني انشغلت عن الموضوع.. بس والله ببالي يا صديقتي..
وشوف قلبي على يدي
وهو أغلى ما عندي
وتبغى زيادة في حبك
أجيب لك قلب تاني منين
- رحمك الله يا طلال -
سطل ايس أقدر أقول غير كدا..
من جد المزاج له دوره ويحركني بنسبة 95%..
بس ممكن أقول دلو ينفع.. p:
مين كمان دلو؟
انا وصديق لي راح نؤسس جمعية السطلاء الحكماء أو فيما معناه Aquasonic Scociety
مين يحب يشترك.. طبعًا على شروطي.. << مصدقة نفسها!!
المهم المشترك لازم يكون دلو مية بالمية.. يعني من دماء نقية..
ومستعد للتضحية بحياته في سبيل العمل.. work work work..
ومستعد انه يتجنن في أي لحظة ويجرب البنجي..
يحب يجرب أنواع جديدة من الأكل ويحب يقرأ كل ما طاحت عليه قدماه أقصد عيناه ويداه..
يحب النوم قد عينه ومع ذلك ما ينام غير 4 ساعات بالعافية في اليوم.
فمن يجد في نفسه المواصفات السابقة الرجاء التقدم بالطلبات لكافة فروعنا.
وآدي دأني لو نجحتوا!!!!!
نكمل ترتشة في يوم تاني..
سلام مكوكي..
<<الصفحة الرئيسية