<<الصفحة الرئيسية
الثلاثاء, 27 فبراير, 2007
مساء الورد..
قلت أطلع شوية من الزخم العلمي اللي أنا فيه وأفرفر شوية هنا.. D:
ممم من فين نبدأ!!
طيب نبدأ بالجامعة وكيف شكل المحاضرات ، دا أول أسبوع دراسي بالنسبة لنا..
كان "كرف" حبتين.. يعني لسه ما دخلنا في التقيل بس لا زال يعتبر نوع من أنواع الكرف..
من أول محاضرة مع دكتور مادة قواعد بيانات أعطاني research أليم وبروجكت أألم.. p:
بس حلو إنو الواحد يدور بنفسو عن المعلومة..
وزي ما أقول أنا دايمًا..
seek knowledge, wherever it is
على العموم.. بنعمل بحث لزيز وخفيف على النفس عن كلمتي SQLite و SQLight وهل لهم علاقة بالـ MYSQL ولا لأ.. :)
طبعا واجهتنا أزمة الكتب كالعادة..
ففكرت في فكّيرة حلوة..
"تبادل" الكتب العلمية الدراسية..
لو رحتو على موقعي الأساسي من محطة الانتقال..
حتلاقوا section عملتو بس ما بدأت فيه وأبغاه يكون بازار أو سوق خيري.. :)
الكل يستفيد..
بس أبغى آخد منكم شوية اقتراحات بما انه الموضوع مني ومنكم وكلنا حنستفيد..
طبعا طبعا أول شيء حأقتصر في الموضوع على بنات وأولاد مكة وجدة..
على أساس التبادل بيكون أسهل وأفضل..
وما أضمن البريد يوصلي كل الكتب ولا يمنعوها..
وفي نفس الوقت البريد الخاص غالي سعرو وراحت الفكرة في الفايدة..
عشان كدا..
حأبدأ أحط محاضرات ومزكرات للتحميل online وتكون مفتوحة للكل..
واللي يستفيد منها يدعي لي..
واللي حابب يشارك بمزكراته وأفكاره يراسلني ببريدي الالكتروني أو يحط لي فكرته هنا..
بعدين حأبدأ أحط الكتب اللي ممكن "أعيرها" وأنا أحط تحت كلمة أعيرها مليون خط..
عشان الكتاب لا يباع مرة تانية.. ؛)
ايش رايكم..
أفيدوني..
ولو الاقتراح ما لقيت منو تجاوب حأحط بس المزكرات وعروض الباوربوينت للـdownload..
كونوا بخير..
سلام مكوكي..
الاحد, 25 فبراير, 2007
مرحبًا بجميع زوار الفضاء..
بدأت المسابقة الوطنية لمهارات الحاسب الآلي..
أعرف إني أتأخرت بوضع اعلانها..
لكن فكرت يمكن أحد يعرفها عن طريقي ويشارك فيها ويكسب وياخد جائزة ابداع.. :)
زوروا موقع المسابقة وحتعرفو عنها كل شيء..
بالتوفيق للجميع..
سلام مكوكي..
الجمعة, 16 فبراير, 2007
عارفين كم عمر فضائي المكوكي؟؟
عمره سنة !!
وعارفين كم مقال فيه؟؟
فيه 90 مقال ودا المقال الـ91 !!
وعارفين كم فيه تعليق؟؟
فيه 1482 تعليق !!
وعارفين كم عدد الزيارات لمقالاتي لحد الآن؟؟
عددها 13353 زيارة !!
حلو صح؟؟ ^_^
سلام مكوكي..
الاربعاء, 14 فبراير, 2007
مرر لي المدون الصديق ماشي صح هذا الواجب،،
هو مو واجب الا ممكن نقول عليه فضيحة!!
بسببه تبان وتطلع كل الخوافي والفضائح والأباهير ، بس ان شاء الله مافي أحد يستخدمها ضدنا أو يحاول يبتزنا بيها..
عشان في متل يقول.. اللي يمسكني من اليد اللي توجعني اكسرها!! D:
ما علينا..
المفروض على حسب الواجب أسرد لكم خمس حاجات انتو ما تعرفوها عني..
ممم.. احترت في حاجات كتير..
وفي حاجات اكتر احسب انو محد يعرفها طلعتو تعرفوها..
بس اللي حتعرفوه دحين هو:
1- أنا ما آكل فول نهائيًا نهائيًا نهائيًا..
وحدة مرة في حياتي جربتو وبعدها حرمت.. شكلو شهي ونفسي آكله بس ما أقدر.. :/
مع اني آكل أي شيء تاني.. بس الوحيد اللي ما آكله الفول..
2- عندي بنطلون جينز اشتريته من تالت متوسطة ولحد الآن ألبسه..
دليل على ايش؟؟ ;)
على اني انسانة غير طبيعية.. @_@
3- اول شيء أسويه لمن أصحى من النوم أسرّح شعري..
مو أدخل الحمام الله يعزكم ، لا اول شيء اسرح شعري واضبطه وبعدين اكمل باقي المسلسل اليومي..
4- بمناسبة الحديث عن الشعر ، انا انسانة ما امشط شعري لا بفرشة ولا مشط الا وحدة مرة بعد الاستحمام..
غير كدا مرة ما أمشطه لحد ما استحم مرة تانية..
أكيد تسألو ايش التناقض دا؟ كيف ما أمشطو واسرحو أول ما أصحى من النوم؟؟
أنا أقولكم. الفرق بين التمشيط والتسريح..
اني لمن امشطه يعني امرر الفرشة او المشط فيه زي الخلق كلهم..
ولمن اسرحو يعني المه ذيل حصان بس واضبطه بأصابيع يدي ، وأحيانًا أضبطه حتى لو كان مفرود..
5- طيب ايش كمان اقول.. ايوا.. انا مدمنة زيتون.. :)
سلام مكوكي..
الثلاثاء, 06 فبراير, 2007
الحمد لله نجحت ، بعد المشوار الأليم في الاختبارات والأزمات النفسية والعقلية اللي اتعرضت لها..
شفت نتيجتي ولله الحمد مرضية..
على قد ما أعطيت على قد ما ربنا أعطاني..
الحمد لله رب العالمين..
مبروك لكل اللي نجحوا.. وبالتوفيق للبقية..
سلام مكوكي..
السبت, 03 فبراير, 2007
لحد الآن أنا مني متخيلة إننا خلصنا دراسة..
طبعا مو للأبد.. بس بالنسبة لي بديت بالإجازة..
وقررت إني أشتغل وأشغل مخي في الإجازة دي وما أقعد كدا زي قلّتي..
فمسكت الدروس الخصوصية تبع محمد وجالسة أتعلم php.. :)
اللي يحب يتعلم كمان يعطيني خبر عشان نتعلم سوا..
هي تلاتة وتلاتين درس..
لو كل يوم درسين يبغالي اسبوعين ويومين ان شاء الله..
بديت من يوم الخميس.. يعني الجمعة بعد اسبوعين وقبل الجامعة ما تبدأ أكون خلصتها بحول الله..
حلو؟ ايوا حلو.. D:
ربي يوفقني ويفتح مخي ويسهلها علي..
أصلًا أنا الحمد لله شايفتها سهلة جدًا لإنها لغة تشبه لغة البرمجة C/C++ ولغة الـ html ، وبما إني أعرف الاتنين فالأساس سهل بس المختلف هو الأكواد حقت اللغة.. :)
أنا مرة متنرفزة من دول الجيران اللي يجوا ويعلقوا على مدونتي ولا مدونات الناس التانين تعليقات هبلة.. وأعذروني عالكلمة..
يعني يعمل واحد تعليق ويعمله كوبي وبيست في جميع المواضيع..
يا لطيف.. كل الناس دول ما يستاهلوا تعليق شوية مختلف.. شغل مخك واطلع لك بكلمة في كل مرة!!
ولا يجي ويلطعلك عنوان موقعه ولا مدونته ويقول زوروني..
أزورك على أي أساس وحضرتك ولا معبر الموضوع ولا صاحب الموضوع ولا الدنيا كلها..
طيب على الأقل أقرا الموضوع وحط رأيك فيه وبعدين الطع عناوينك زي ما تحب..
قلة أدب..
أنا شكلي من اليوم ورايح ازا شفت حاجات تسد النفس كدا بأعملها حذف.. واللي مو عاجبه كلامي لا يجي ويعلق عندي ولا يوريني وجهه..
مرة كتروا المنافقين..
نفسي يخترعوا سم بيوكيميائي يعمل عن طريق الاستنشاق ويوصل للمخ ويختبر أصل الواحد..
منافق؟ وقف يا عمي كل أجهزته الحيوية محد بيأسف عليه..
منت منافق؟ سيبو في حاله..
خلونا نعمل تطهير في البلد شوية..
مدري ايشبي فجأة حميت وعصبت.. :/
معليش..
يالله علقة تفوت ولا أحد يموت..
سلام مكوكي..
<<الصفحة الرئيسية